Tuesday, November 17, 2020

VANDAMIKIÐ VEGAMÓT Í HOYVÍK

Vegamótið Pætursgøta/Løgmannabreyt er sera óheppið gjørt og er tí vandamikið. 


Sum tað sæst á myndunum, so síggja bilførarar, sum koyra út úr Pætursgøtu og ætla sær omaneftir Løgmannabreyt, ikki fólk ella súkklur, sum koma niðaneftir gongubreytini á Løgmannabreyt, fyrr enn alt ov seint er og ofta er vandi fyri, at fólk og súkklur verða ákoyrd. 

Eg súkkli sjálvur her dagliga og av ringum royndum steðgi eg altíð á, tá ið eg komi til vegamótið, tí eg havi nakrar ferðir verið um at vera árendur. Og mangan kemur bilur fúkandi fram við og eg síggi, hvussu kløkkir bilførararnir gerast, tá ið teir varnast, hvussu nær teir fara fram við mær, sí mynd 1, 2 og 4.

Eitt er, at bilførararnir mugu hava eyguni niðaneftir fyri at síggja, um nakar bilur kemur á veg banan omaneftir, men verri er, at koyrt verður skrátt inn á eitt øki í gongubreytini, sum teir ikki síggja, tí ein garður stendur har. Somuleiðis síggja tey, sum ganga/súkkla niðaneftir ikki bilin fyri sama garði.

Tað skal ikki so nógv til fyri at betra munandi um vegamótið, bara eitt ella annað slag av forðing, sum kann gera, at bilførararnir ikki skera svingið av, men noyðast at koyra eitt sindur longur út um garðin áðrenn snarað verður, sí mynd 3.



Sunday, November 8, 2020

Vit skulu tryggja umhvørvið og inntøkur í sambandi við aling í kommununi


Alibrúk í Tórshavnar Kommununu geva alarum tíggjutals milliónir í vinningi. Men sera lítið av hesum liggur eftir í kommununi - og tað er ikki ordiliga í lagi. Og als ikki, tá ið vit hugsa um, hvussu stóra ávirkan alifyritøkur hava á lokalu umhvørvini.

Sum dømi gevur alibrúkið úti á Gulanum 50-60 milliónir í nettovinningi um árið. Tað einasta, sum er eftir í kommununi, er eitt sindur av partafelagsskatti og nakað av havnagjaldi fyri smáar alibátar. 

Aliloyvi eru ikki kommunal mál. Men ávirkanin av alingini fer fram í kommununum og ikki minst árinið á náttúruna. Tí eigur kommunan at vera virkin viðspælari í tí, at tryggja, at umhvørvið sum minst verður órógvað. 

Jón Kragesteen, Tjóðveldi 

Friday, November 6, 2020

Á seiðaberg á molanum

Vit skulu gera eina gonguleið úteftir nýggja brimgarðinum og á vegnum nøkur seiðbergspláss

Á henda hátt fáa vit eina ótruliga vakra gonguleið á 1 kilometur fram við sjóvarmálanum á fyrstu parkett.  

Á hóskandi støðum kunnu benkur setast upp og so gerast nøkur seiðabergspláss. 

Shengenøki skuldi ikki verið darvað av hesum um eitt nóg høgt hegn verður sett inn mót keiøkinum. Tað hevði verið áhugavert at sæð eitt arkitektteknað uppskot av hesum.

Við hesum høvdu vit endurskapt hugtakið: "at fara gongutúr út á molan".

Jón Kragesteen, valevni fyri Tjóðveldi

Wednesday, November 4, 2020

Kloakkfundur í Sjónleikarhúsinum


Kloakkviðurskiftini í gomlu býarpørtunum eru mangastaðni ikki í lagi. Ofta er ramur roykur millum húsanna og í summi hús er ikki innfarandi fyri kloakklukti. Hetta kemur enntá fyri seg í handlum og skeinkistøðum. 

Orsøkin er at kloakkirnar eru ikki gjørdar, sum tær eiga at verða gjørdar, rørini eru tærd, tey eru brotin ella tey eru als ikki har. 

Úrslitið er, at kloakkroykur og óhumska lekur út í tún og garðar. Fólk, sum búgva ella arbeiða í hesum økjunum, standa hjálparleys og noyðast at liva áravís í hesum umstøðum við niðursettari lívsgóðsku.

Í sjónleikarhúsinum í dag 4. november kl. 19.00 verður almennur fundur um hetta evnið - við luttøku av fleiri politiskum flokkum. 

Fundurin verður eisini stroymaður og sæst her: https://youtu.be/A-zbj5JobVU  

Kloakkirnar eru er ein av kjarnuuppgávunum hjá kommununi og skal raðfestast sera høgt

Jón Kragesteen, valevni fyri Tjóðveldi


Tuesday, November 3, 2020

TRØ SKULU IKKI VAKSA INN Í HIMMALIN


Misskil meg ikki, eg elski trø og trævøkstur og havi ein dreym um, at stór øki í Føroyum verða skógarvaksin, lat tað vera sagt! 

Men, tað er ikki gott fyri trivnaðin í grannaløgum, at trø vaksa seg so stór, at tey taka útsýnið og sól frá frá bæði fólki og vøkstri annars. 

Vit eiga at hava eina reglugerð í kommununi fyri, hvussu og hvar trø verða plantað - og hvussu høg tey skulu hava loyvi at vera. 

Tað vil eg arbeiða fyri.

Thursday, October 29, 2020

KLOAKKIR SKULU VEITAST ÚT Á STREYMASJÓGV

Fólk skulu kunnu svimja í sjónum uttan at hava ampa av kloakkvatni. Um tað ikki ber til leiða kloakkirnar út á streymasjógv, mugu tær reinsast.

Ein av náttúruperlunum í kommununi er Sandágerð, ein vík við hvítum sandi, ósa og vøkrum fossi, eitt ótrúliga vakurt umhvørvið.
       
Men... um tú hyggur út á vágna nakað út frá Sjósavninum, sær tú at sjógvurin speglar seg øðrvísi og kanska sært tú, at fuglur situr har.

Orsøkin er, at har er eitt útrensl frá einari kloakk og fuglurin, sum situr har, bíðar eftir onkrum spennandi at finna.

Og hóast fossurin er vakur, so er vatnið í Sandá neyvan reint, tað luktar í øllum førum ikki væl. Undir sjúkrahúsinum er sama skil og vatnið, sum kemur innan úr havnarlagnum er heldur ikki serliga reint. Tá ið áarføri er, er heilt galið á Eystaru Vág, tí at tá flytur kloakkin yvir, sum annars rennur út í Sersjantavíkina.

Hoyvíkin er eisini eitt vældámt stað at svimja í sjónum. Men har er ikki frægari, har rennur kloakk út sunnara víkarmunna og ein onnur beint norðanfyri við Kúrberg.

Tað er tí við blandaðum kenslum, at eg hyggi eftir myndum, sum fólk leggja út av sær, meðan tey svimja í Sandágerði og Hoyvík - ja tað kennist eitt sindur sum at spilla spælið at skriva hetta her.



Men, sum myndin sýnir, eru kloakkrensl, sí "UA...", allan vegin av Argjaboða og norð á Hvítanes - og ikki øll renna út á streymasjógv!

At skipa kloakkir er ein av kjarnuuppgávunum hjá einari kommuni og hetta er nakað, sum eg vil raðfesta høgt, um eg fái møguleikan.

Jón Kragesteen, valevni fyri Tjóðveldi

Sunday, October 25, 2020

Høllin á Hálsi til tjóðarhøll


Høllin á Hálsi eigur at verða útbygd, so at býurin fær eina stórhøll, sum kann húsa altjóða dystum, stórum konsertum og fundum - eina tjóðarhøll. Tað hevur týdning, at slík høll er sentralt í býnum, so øll ikki nýtast at skula ferðast í bili, men kunnu eisini ganga ella súkkla.

Í dag sær høllin soleiðis út, ein long høll, sum, tíverri ikki lýkur altjóða krøv. Vanligu áskoðaraplássini eru minkað nógv, eru trengri og harðari. Tá ið stóru áskoðarapallarnir verða drignir út - onkuntíð, tá ið størri dystir eru, skulu áskoðararnir hyggja í gjøgnum eitt net, umframt at áskoðararnir skulu sita aftan fyri fyri málið - og tí verður langt yvir í hin endan. Til konsertir er kapasiteturin hjá høllini ikki blivin størri. Tí tey, sum skulu framføra kunnu ikki vera í øðrum endanum, tað verður ov langt millum tey, sum framføra. Hølið minnir meira um eina langa gongd.


Mítt uppskot er, at tað skal verða bygt upp í høllina vestur eftir í norðara enda, sum myndin sýnir. So vera 3 venjingarvøllir og pláss at gera vøll tvørtur um við flytiligum áskoðaraplássum til eini 2-3000 fólk. 

Eitt boð upp á, hvussu útsjóndin kundi verið úr erva, um slík takkonstruktiónin var vald


Útsjóndin frá ringvegnum: Undir høllini er pláss til ymisk sløg av ítrótti. Ein annar møguleiki kundi verið, at ÍSF og sersambonduni fingu høli her.


Í kortal.fo sær soleiðis út, sí reyðu strikuna. Víst skal verða á, at gott pláss er at flyta gamla Hoydalsvegin eitt vet. Góðir parkeringsmøguleikar eru í økinum, bæði við Svimjihøllina, Tórsvøll og við Høllina Hálsi. Ætlanir eru frammi  at leggja dekk á seinast nevnda við tí endamáli, at fólk í dagtímunum kunnu parkera har og taka bussin oman í býin. Við dekki oman á kann talið av parkeringsplássum tvífaldast.